【火拼持續】醫生界怒斬AIA「CEO」保單「唔要咁嘅服務！」

有醫生指，不少同行都有買AIA最貴的醫保「CEO plan」，正考慮「cut單」：「呢個plan包好多嘢，好多醫生都成家人一齊買。依家AIA單方面收窄索償條件，對投保人好唔公道。」他自己亦已決定「cut單」：「個agent識咗好多年，預咗會反面，但都無辦法。」

近日AIA已收緊病人入院門檻，有不願公開身份的醫生直指，：「原本有病人已排期入院照腸鏡，寫好晒詳細證明病人屙血，情況嚴重要求入院。但係上星期病人同我講AIA唔批，claim唔到，但以往一直都可以，最後個被迫喺日間手術中心做，病人梗係好無奈。」

醫學會義務秘書外科醫生林哲玄舉例指，日間診所做手術其實亦有其風險：「好似有個三十幾歲嘅成年人，我用手摸已經摸到個腫瘤，但腸都唔係全閉，依個case係可以喺屋企飲瀉藥，無話唔得，但風險高好多。同埋我之前已經摸到個腫瘤，掃瞄、驗血基本上一定要做，如果喺醫院當然一齊做埋，排好手術期先出院。但係如果喺中心做，做完又要自己去化驗所做掃瞄，再隔多個禮拜先嚟覆診，程序上係可以，但大家想要嘅醫療服務係唔係咁？AIA背後有龐大團隊支援，所有嘢做到滴水不漏，好難觸犯任何條例。」

他補充，現時市民購買醫保十分普遍，政府必須確保醫保覆蓋範圍及條款是否合乎公眾利益：「之前政府推自願醫保，我都係諮詢委員會成員之一，當時政府希望市民增加對醫保嘅信心，但討論咗兩年，理賠原則同條款差唔多冇傾過，呢家依件事爆出嚟，我諗政府都要留意。」

事件已演變成AIA與醫生界的爭辯，AIA香港及澳門首席科技及營運官葉文傑指：「我講一個 example，如果係好急需當晚即時emergency入院做手術，我相信我地絕對係一定會作出賠償。但如果係急需但排期兩三個星期，都唔去等待時間較短的日間手術中心做，咁我地就會懷疑點解佢要話要急需？」

有AIA前線員工指，事件已嚴重影響士氣：「初步對生意無影響，但係好多同事都質疑，點解要出封醫療需知信。有部門阿頭甚至喺Facebook搞一人一claim report活動，叫啲同事俾客人睇，證明正常情況係claim得足。」但有其他保險公司經紀就指，近日不少持AIA醫保的客人，主動查詢轉保單事宜，似乎AIA仍要繼續拆彈。